Wéi steet et mat der Weiderbildung an der Landwirtschaft?

Den DP-Deputéierten André Bauler huet beim Landwirtschaftsminister no Detailer iwwert d'Weiderbildung an der Landwirtschaft gefrot.

Eng europawäit Registréierung vu rietsextreme Gruppen?

De Conseil vun den europäeschen Inneminister huet am Oktober iwwer d’Menace vum Rietsextremismus an Europa geschwat. Des weideren huet Europol an engem geheime Bericht gewarnt, dass rietsextrem Gruppéierungen Leit vum Militär oder vu Sécherheetsfirmen rekrutéiert. An dësem Kontext huet déi finnesch Presidentschaft vum europäesche Conseil eng europawäit Registréierung vu rietsextreme Gruppe gefuerdert. Dëst stéisst awer net bei all Memberstaat op Zoustëmmung.

An dësem Kader huet eisen Deputéierte Gusty Graas e puer Froen un déi zoustänneg Ministere gestallt.

Verkéierssécherheet bei de Schoulen

Ëmmer nees héiert ee vun zum Deel chaoteschen a geféierleche Situatioune moies, wann Elteren hir Kanner mam Auto bei d’Schoul oder de Lycée féieren, dat virun allem wärend de Wanterméint. Den DP-Deputéierte Max Hahn huet beim zoustännege Minister nogefrot, wat de Minister gedenkt z'ënnerhuele fir d'Verkéierssécherheet virun de Schoulen ze verbesseren.

Ee Bachelordiplom an der Infirmerie zu Lëtzebuerg?

Am Géigesaz zu eise Nopeschlänner, bidd Lëtzebuerg kee Bachelordiplom an der Infirmerie un. D'Carole Hartmann an de Gilles Baum hunn zu dësem Sujet Froen un déi zoustänneg Ministere gestallt. 

Sensibiliséierungscampagnen fir Gesondheetsberuffer och a Lëtzebuerg?

Bei all de medizinesche Sevicer besteet de Risiko vun engem Personalmangel an de nächste Joren, esouwuel bei den Dokteren ewéi och bei den Infirmieren. Verschidde Länner hunn Sensibiliséierungscampagnen organiséiert fir Gesondheetspersonal ze rekrutéieren. An dësem Kontext, hunn d'DP-Deputéiert Carole Hartmann an de Gilles Baum Froen un de Gesondheetsminister gestallt. 

Ginn et tatsächlech Iwwerleeungen d'Boergeld ofzeschafen?

Ëmmer nees komme Spekulatiounen op, dass d'Boergeld iergendwann eng Kéier ofgeschaaft soll ginn. Anscheinend hätt z.B. och déi Europäesch Kommissioun dat an engem Strategie-Pabeier proposéiert. Fir op dës Suerg vu ville Leit ze reagéieren, hunn d'DP-Deputéiert Gilles Baum a Gusty Graas beim Finanzminister nogefrot, fir gewuer ze ginn, wat déi europäesch a lëtzebuergesch Positiounen zu dem Sujet sinn.

Wat geschitt mat dem alen Verwaltungsgebai zu Dikrech?

A senger rezenter parlamentarescher Ufro freet den DP-Deputéierten André Bauler, wat mat dem ale Verwaltungsgebai zu Dikrech an der Alex Heck Strooss geschitt. Muss et wierklech ofgerappt ginn oder kéint et net nach fir aner administrativ Zwecker genotzt ginn?

Sichhënn fir dout Wëllschwäin och zu Lëtzebuerg?

D’Saarland ass genau wéi Lëtzebuerg nach net vun der afrikanescher Schwéngspescht betraff. Trotzdeem bereeden si sech op de Fall fir falls dëse Viraus an hire Bëscher ausbrécht. Dofir hu si speziell Sichhënn ausgebilt déi doudeg Wëllschwäi séier kënne fannen. Falls de Virus nämlech ausbrécht, ass et enorm wichteg, déi krank Wëllschwäi séier ze fannen an ewechzebrénge fir datt se keen anere kënnen ustiechen. Den DP-Deputéierte Gusty Graas huet bei de zoustännege Ministeren nogefrot, ob Lëtzebuerg och plangt esou Hënn auszebilden oder ob d’Hënn aus dem Saarland och zu Lëtzebuerg kéinten an den Asaz kommen.

Wéi gesäit et mat der Cybersécherheet an de Spideeler aus?

Am Hibléck op eng gréisser Bedeitung vu perséinlechen Donnéeën an enger progressiver Digitalisatioun, gëtt et och fir Spideeler a fir privat Praxen ëmmer méi wichteg d'Daten vun hire Patienten ze schützen.

An dësem Kontext, haten d'DP-Deputéiert Carole Hartmann an de Gilles Baum ë puer Froen un déi zoustänneg Ministeren.

Wat huet den AOP - Qualitéitslabel de lëtzebuerger Wäiner bruecht?

2014 gouf den AOP - Qualitéitslabel fir d'lëtzebuerger Wäiner agefouert. Den DP-Deputéierte Gilles Baum freet beim Wäibauminister no wat dës Ëmstellung fir d'Produktioun, de Verkaf zu Lëtzebuerg an den Export vun eise Wäiner bedeit.

Firwat ass de Nationale Kriibsplang 2019-2023 nach net implementéiert ginn?

De Nationale Kriibsplang fir den Zäitraum 2019-2023 ass ausgeschafft, mee bis haut ass en nach net implementéiert ginn. Den DP-Deputéiert Gusty Graas huet beim Gesondheetsminister eng Erklärung gefrot.

Waasserschutzzonen um Stauséi: Feeler an der Methodologie?

D'Landwirtschaftskummer huet sech an engem rezenten Avis zu de Waasserschutzzonen ëm de Stauséi d'Fro gestallt, ob de Projet de Règlement Grand-Ducal op verlässlechen Donnéeë baséiert. Effektiv hätt si eng Rei Inkoherenze festgestallt. Den DP-Deputéierte Gusty Graas wëll dowéinst vun der zoustänneger Ministesch wëssen, wat hir Reaktioun op dësen Avis ass, an ob si eventuell gedenkt, den RGD unzepassen?

Wou ass de Remboursement vum NIFTY-Test drun?

De NIFTY-Test erlaabt et wärend der Schwangerschaft de Risiko vun enger Trisomie anzeschätzen. 2016 gouf een Aarbeschtsgrupp domadder beoptragt Critèren fir ee Remboursement festzeleeën. D'DP-Deputéiert Carole Hartmann a Gusty Graas haten an dësem Kontext e puer Froen un déi zoustänneg Ministeren.

Leeft knaschtegt Waasser iwwer d'Reewaasserkanalisatioun an d'Natur?

D'Reewaasserkanalisatioun an de Stroosse gëtt net méi un d'Kläranlag ugeschloss, mee d'Waasser gëtt direkt an d'Natur lafe gelooss. D'DP-Deputéiert Max Hahn a Gusty Graas hu bei der zoustänneger Ministesch nogefrot, ob si kee Risiko gesäit, dass op deem Wee knaschtegt Waasser, wéi Seefewaasser oder Faarfreschter, an der Ëmwelt lande kéinten.

UV-Luucht amplaz Chemikalien bei der Waasserbehandlung?

Am Ausland ginn et scho Projete bei deenen ultraviolett Luucht geholl gëtt, fir d'Waasser a Kläranlagen oder an Anlage fir Drénkwaasser propper ze maachen. Den DP-Deputéierte Gusty Graas huet bei der zoustänneger Ministesch nogefrot, ob dës Technologie och zu Lëtzebuerg benotzt gëtt, a wann net, ob et virgesi wier, se als nohalteg Alternativ zu Chemikalien ze fërderen.